Snælandsskóli

Skólabúðir 9.bekkjar að Laugum í Sælingsdal

LAUGAR Í SÆLINGSDAL

Vikuna 30. janúar – 3. febrúar munu nemendur 9. bekkjar skólans dvelja í skólabúðunum að Laugum í Sælingsdal. Undanfarin ár hafa 9. bekkingarnir okkar átt kost á því að dvelja í skólabúðunum við leik og störf eina viku í senn. Þessi árvissa ferð hefur svo sannarlega skilað góðum árangri í gegnum tíðina, bæði námslega og ekki síður félagslega. Nemendur hafa verið duglegir við að safna fyrir ferðinni og þátttaka er góð. Vonandi verður ferðin lærdómsrík og ánægjuleg.
Góða ferð

Þorgrímur Þráinsson rithöfundur kom í heimsókn í 10. bekkina

Þorgrímur Þráinsson rithöfundur kom í heimsókn í 10. bekkina okkar föstudaginn 27. janúar sl. með fyrirlestur sem hann kallaði „Lífið og tilveran“. Þar fjallaði Þorgrímur um mikilvægi þess að bera ábyrgð á eigin lífi og árangri og hvernig nemendur geta styrkt sjálfsmeðvitund sína áður þeir halda í framhaldsskólann. Fyrirlesturinn er í boði Pokasjóðs og þar með skólanum að kostnaðarlausu. Krakkarnir voru mjög ánægð með heimsóknina. Góð leiðsögn út í lífið. Smellið á myndina.

Heimsókn 3.bekkjar í MS

Það hefur verið hefð fyrir því í Snælandsskóla að þiggja boð MS um að koma í heimsókn með 3.bekk í fyrirtækið. Það er ágætis sýning þar uppi, sem sýnir hvernig mjólkuriðnaðurinn hefur þróast og breyst, bæði tæki og vinnsla, þannig að krakkarnir sjá hvernig hinar ýmsu mjólkurafurðir verða til. Þessi heimsókn hefur verið vinsæl og kemur mjög vel heim og saman við samfélagsfræðinámsefni 3. bekkjar (Í sveitinni með Æsu og Gauta). Það var frábærlega tekið á móti okkur og starfsmenn Mjólkursamsölunnar lögðu sig fram við að fræða og upplýsa börnin um mjólkurframleiðsluna samhliða góðri leiðsögn um fyrirtækið. Börnunum var síðan boðið upp á hressingu, íspinna, mjólk, vatn og kleinur. Einnig er vert að geta þess að 4.bekkur hefur lengi tekið þátt í myndasamkeppni Mjólkursamsölunnar og nokkrum sinnum unnið þar til verðlauna. Smellið á myndina.

Fjöltefli í Snælandsskóla

Lenka Ptácnikova skákkennari í Snælandsskóla og maður hennar Omar sem einnig er skákmeistari og skákkennari tefldu fjöltefli í Snælandsskóla í tilefni skákdags í flestum grunnskólum landsins til heiðurs Friðriki Ólafssyni, fyrsta íslenska stórmeistaranum í skák. Nemendur og starfsfólk fylgdust með fjölteflinu sem fram fór í sal skólans. Smellið á myndina.